O BNG di literalmente que “ a receita de Brión leva dous anos cociñándose en Ames, e cheira a rancio”. Os nacionalistas consideran que a actitude de Blas García e unha “burla aos seus votantes”
O BNG de Ames considera que desde hai dous anos hai un acordo encuberto entre Psoe e PP similar ao de Brión. Tachan ao alcalde de “personalista e autoritario” e engaden que “trátase dunha burla á veciñanza que votou en clave progresista para acadar un goberno de esquerdas e recibiu un pacto Psoe-PP”.
Blas García, en declaracións aos medios de comunicación, dicía ao respecto que “O BNG debe preguntarse por que tantos alcaldes progresistas non queren gobernos de coalición con el”. Os nacionalista responden que non precisan preguntar e que o saben con certeza “sabemos que somos un grupo incómodo porque esiximos medidas progresistas e sociais que ao PSOE lles molestan e entendemos que estean máis cómodos co PP cos que comparten intereses”.
Para o BNG o Psoe, en Ames e en xeral, só intenta diferenciarse deles despois dunhas “eleccións penosas” e engaden que se trata de “unha estratexia perigosa, xa que para tratar de afastarse e diferenciarse do BNG bótase en brazos dun PP que aplaude a súa incoherencia e incapacidade de análise político da realidade do país no que vive”.
O BNG acusa tamén ao Psoe de actitudes similares ás do PP “mimetizouse até tal punto coas formas do PP, que mesmo utiliza a páxina web (como fai o PP coa CRTVG), unha páxina de información institucional, como se fose a do partido socialista e remite polo boletín municipal o balanzo destes dous anos de lexislatura, a sabendas de que non se pode utilizar o soporte da institución para destacar os logros de xestión ou os obxectivos acadados por un partido”.
Os nacionalistas reividincan ademais o traballo realizado nos gobernos anteriores “a veciñanza de Ames sabe perfectamente que de non ter pasado os nacionalistas polo goberno municipal todos os servizos de conciliación, as escolas deportivas, ou as políticas culturais e lingüísticas, non existirían”.
