Teo, 21 de maio do 2021 – O Partido Socialista acusa a Xunta de Galicia de conivencia coa propietaria da canteira da Casalonga en Teo para converter o espazo nun vertedoiro.
A Deputada Noa Díaz visitou o lugar para reunirse coa Plataforma Casalonga Limpa de Residuos. Díaz presentou aos representantes veciñais as iniciativas que levará ao Parlamento destinadas á recuperación medio ambiental da Canteira.
A responsable socialista denunciou o “vertido incontrolado de residuos” e “desleixo” do goberno galego fronte ao déficit absoluto de seguridade na zona. Noa Díaz acusou ao goberno galego de “poñérllelo todo fácil á empresa”, que logo de 25 anos sen actividade extractiva, e cando “tiñan que producir a caducidade da actividade mineira”, o que fixeron foi decretar a súa suspensión cautelar porque “parece molestarlles que de vez en cando haxa veciños da Plataforma na zona”.
A Deputada pediulle ao goberno galego que faga unha nova Declaración de Impacto Ambiental –DIA- da explotación, logo de que a Xunta dixera no seu día que tiña que presentar un informe detallado da fauna e flora, pero que “quedou en nada”. Denuncia así que a Consellería de Medio Ambiente permita que o Plan de Restauración presentado pola empresa saia adiante baseado nunha DIA de 2001.
Lembrou que os informes reflicten a situación da zona hai 20 anos, e considera “cando menos curioso que a Xunta non teña en conta o cambio absoluto da contorna”, obviando que neste período a lo menos foron creadas dúas lagoas naturalizadas con ecosistemas completos asentados que non existían cando foi redactado o plan de restauración de 1998.
