Compostela, 6 de setembro do 2023 – ACUAES ven de licitar o contrato de execución das obras da nova depuradora de Silvouta, en Compostela, por 53.904.036 euros.
A intención é que a obra sexa adxudicada en decembro e que en xaneiro comece un prazo dun mes para o desenvolvemento do plan integrado de xestión de obras da nova depuradora. A partir de aí iniciase outro prazo de dous anos e tres meses para a execución das obras o que nos sitúa na primavera do 2026.
O obxectivo desta actuación é pór fin aos problemas de capacidade que ten a actual depuradora e eliminar as verteduras contaminantes ao río Sar. Construirase unha nova depuradora, que tratará un caudal medio de 52.000 m3/día, para 277.000 habitantes equivalentes. A obra conectará o novo equipamento á rede existente e executará unha nova acometida eléctrica compatible coas necesidades enerxéticas da nova instalación e dotada dunha subministración eléctrica de respaldo.
O contrato incorpora ademais a explotación da actual EDAR durante un máximo de 19,5 meses durante a construción, máis seis meses durante a fase de posta en marcha, por un importe de 12.523.935 euros, que será sufragado desde o inicio polo Concello.
Está previsto que o proxecto sexa cofinanciado polos fondos Next Generation da Unión Europea, en virtude do convenio de colaboración que ACUAES, a Xunta de Galicia e o Concello de Santiago de Compostela asinaron o 5 de febreiro de 2021 para a execución, financiamento e explotación da instalación.
