O goberno socialista de Noia acadou co BNG uns orzamentos “centrado na racionalización do gasto e na priorización dos servizos básicos”. O acordo foi presentado polo alcalde, Francisco Pérez; o tenente de alcalde e concelleiro de Facenda, Manolo Seijas; e do voceiro do BNG, Ricardo Suárez.
Os orzamentos nacen de “meses de traballo técnico e político, nos que se analizaron en detalle as contas municipais, as obrigas pendentes e as marxes reais de actuación do Concello”.
Prioridade absoluta aos servizos básicos
Os orzamentos alcanzan os 14.736.219,18 euros, medio millón máis que en 2024. Aposta por priorizar o gasto nos servizos básicos, reorientando partidas e reducindo investimentos e programas considerados non esenciais, co obxectivo de garantir o funcionamento dos servizos públicos fundamentais.
Débeda
O orzamento nace nun escenario económico especialmente delicado, cunha capacidade de investimento e de gasto moito menor ca en exercicios anteriores, marcado polas débedas acumuladas e obrigas herdadas, entre elas compromisos coa Mancomunidade Serra do Barbanza.
Por este contexto a xestión de residuos pasa de menos dun millón de euros en 2024 a 2.115.566,40 euros en 2026, axustándose ás cotas reais e permitindo iniciar a regularización da débeda acumulada.
Pacto da auga
O voceiro do BNG definiu o acordo como “o pacto da auga”, en referencia ao forte impulso ao saneamento e á mellora do servizo de auga potable. Subliñou que o orzamento “supón un investimento en saneamento sen precedentes”, e destacou a importancia de avanzar cara a unha planificación integral das redes de saneamento e abastecemento.
Neste eido inclúense actuacións en bombeos e redes, e unha aposta específica pola xestión da auga potable, cunha dotación de 50.000 euros para contratar un servizo especializado na ETAP, ademais de 25.000 euros para actuacións nas captacións.
Outras partidas a destacar son os 175.000 euros para a licitación do servizo de limpeza viaria; a elaboración dun plan de mobilidade e 85.000 euros para unha futura intervención no Paseo Antón Avilés de Taramancos (Labarta).
Logro colectivo
O alcalde puxo en valor que o Concello de Noia volva aprobar un orzamento no mes de xaneiro, algo que non se producía desde había moito tempo “É un logro colectivo e un paso adiante na estabilidade institucional”, afirmou.
Agradeceu expresamente o enorme esforzo do concelleiro de Facenda e do persoal técnico municipal, así como a responsabilidade do BNG para facer posible este acordo.
Subliñou que as contas están baseadas na “racionalización, eficiencia e seriedade na xestión económica”, co obxectivo de ordenar o Concello, cumprir coas obrigas pendentes e poñer os recursos onde realmente fan falta. Tamén se salientou o aumento en promoción económica, que pasa dos 147.149,30€ en 2024 a 265.955€ en 2026.
Francisco Pérez destacou a prioridade que teñen os servizos básicos; a redución en gasto político e gastos superfluos e o incremento no apoio ao tecido asociativo.
O concelleiro de Facenda, Manolo Seijas, destaca pola súa banda que “Nunca se investiron tantos recursos propios nos servizos esenciais”. Explicou que o orzamento supón unha reorientación profunda cara aos servizos básicos, reducindo partidas en todas as áreas non esenciais.
Afirmou con rotundidade que “pese a quen lle pese, o Concello nunca investiu tantos recursos propios en mellorar os servizos esenciais.” Indicou tamén que foi necesario “apertar en todas as áreas, revisar contrato por contrato e priorizar con rigor” para garantir a viabilidade económica do Concello.
Neste sentido, destaca que a partida asignada a deportes 197.403,35€ a 89.273,75€, e a de festexos de 354.371,17€ a 254.550,00€, apostando por un modelo máis sostible e equilibrado.
