Músicas na Linde, 20/04/2026 – O primeiro álbum de estudio de ABRIL é unha delicada flor no amplo xardín do folk actual. Non é doado darlle unha volta ás vellas cancións pero ABRIL conseguen imprimir o seu propio selo en cada unha das pezas de “Medrar“.
Teñen moito que ver en esta delicadeza da voz de Claudia Abril e o violín de Marina Carpente xeito e o xeito de usar tan fermosas ferramentas. Ao mesmo tempo é de destacar o traballo de músicos como Juan Arca (Lontras), Sunil López ou Hugo Franco.
“Medrar” supón tamén unha herdanza. As pezas beben de fontes orais e arquivos fundamentais da nosa tradición, dende melodías de Caroi (Cotobade) e Toutón (Mondariz), ata sonoridades de Balouta (Ancares leoneses), o legado de Florencio dos Vilares na Fonsagrada ou o canto de “Teresa dos Cucos” en Malpica.
É unha reivindicación ao mesmo tempo do traballo de investigadores como Xisco Feijóo, Xandre Outeiro ou Guillerme Ignacio responsables da recuperación de algunhas das nove pezas do disco.
Medrar non é só un título; é unha declaración de intencións. O álbum nace do concepto do “lugar seguro”, as redes afectivas e é tamén unha celebración do facer colectivo: un disco construído en equipo: a narrativa visual foi creada por Marte Martinka e Miguel Méndez (Fotomatong), coa escenografía de Laura Iturralde e José Faro ‘Coti’ (nononon.lab) e o deseño gráfico de Sara Castro. O traballo, producido por Zalo Rodríguez e mesturado por Hevi (Laboratorio Soyuz), logra un equilibrio hipnótico onde a pandeireta e o violín conviven organicamente coa electrónica.
O traballo coceuse paseniño e a lume lento entre os estudios Ancestral de Isaac Millán, en Xustáns (Pontecaldelas) e o Pazo de Mariñán (residencias creativas da Deputación da Coruña). A posta en escena de ABRIL, deseñada por Iturralde e Coti, promete levar esa “cabaña” de luz e teas aos escenarios, creando unha experiencia sensorial única que acompañará a voz de Claudia e o violín de Marina.
ABRIL contou ademais co apoio para o desenvolvemento de “Medrar” das Residencias Creativas Mariñán de música, da Deputación da Coruña. Máis alá do que vos digamos en Músicas na Linde acudide ás plataformas a escoitalo, a parar por uns intres e respirar fondo.
