Músicas na Linde, 08/05/2026 – O vigués David Cobas (coñecido polo apelativo artístico Abraham Boba e lider de León Benavente) será este outono o director do V Laboratorio de creación musical de Fundación SGAE Galicia, sucedendo nesta tarefa a nomes como Vega, Iago Pico ou Iván Ferreiro.
Dous únicos proxectos musicais con base en Galicia poderán traballar as súas cancións con Boba, líder do grupo León Benavente, durante unha semana de residencia creativa na sede compostelá da Sociedade Xeral de Autores e Editores (SGAE) e unha serie adicional de encontros telemáticos e clases maxistrais. Ademais, cada seleccionado recibirá un premio de 1.500 euros. As persoas interesadas poden consultar as bases na web de Fundación SGAE () e inscribir as súas solicitudes ata o 8 de xuño no email: pblanco@fundacionsgae.org.
Sobre Abraham Boba
David Cobas (Vigo, 1975), autor e músico, é unha das figuras máis singulares do pop-rock español contemporáneo. No seu catálogo atópanse varios discos en solitario, unha intensa actividade como músico ou produtor para Nacho Vegas e outros artistas e, a partir de 2013, o seu recoñecemento definitivo a través de León Benavente, referencia fundamental para o pop alternativo español actual.
Co seu liderado, esta banda ten entregado discos celebrados pola crítica e mailo público, ten deixado unha influente pegada nas súas presentacións en concerto a ámbalas beiras do Atlántico e, sobre todo, ofrece a Abraham Boba unha plataforma perfecta para desenvolver unha forte identidade lírica e discursiva.
Á súa faceta musical, Boba engade unha vertente literaria cada vez máis salientable, con libros como Esto no es una canción (2021) ou o ensaio autobiográfico 163 centímetros (2025).
