Un evento no que, ademais das filloas, haberá caldo e moita música
A asociación de veciños Os Labregos de Abellá, en colaboración co Concello de Frades, organiza a undécima edición da Festa da Filloa, que terá lugar mañá sábado 15 de marzo no pavillón municipal de Abellá.
Unha celebración que arrincará ás 13:30 horas coa tradicional degustación de filloas e caldo galego. O prezo será o mesmo do ano pasado: 15 euros.
A música correrá a cargo do Dúo Acherizados, que se encargará da sesión vermouth e pola tarde volverá actuar acompañado polo grupo de gaiteiros Son da Terriña, da parroquia de Galegos, e Disco Móbil Impacto.
Así mesmo, haberá sorteos e xogos para as crianzas, con cantina atendida pola Comisión de Festas de Abellá.
A XI Festa da Filloa de Abellá está organizada pola AAVV Os Labregos de Abellá, en colaboración co Concello de Frades, a Deputación da Coruña e a Mancomunidade de Ordes, ao abeiro do Proxecto Nantronte. Unha festa que cada ano atrae a centros de persoas debido ao bo facer das e dos filloeiros, así como ao traballo de todas as persoas voluntarias que participan en cada edición.
