Ordes, 27 de abril do 2019 – O persoal de transporte de Residuos Sólidos Urbanos (RSU) de Sogama considera que é “grave e fóra de lugar” que a Xunta Electoral “censure” a manifestación que tiñan convocada para este sábado pola rúas de Ordes.
Os traballadores están en folga indefinida en demanda da readmisión de 8 compañeiros despedidos e esixen que rematen as presións ás que están sometidos, O presidente do comité de empresa, Manuel Regueiro, considera que non se pode mesturar un conflito laboral cunha campaña electoral “Unha cousa é a campaña electoral e outra isto. Supoño que tamén prohibirán, logo, a festa do champiñón que tamén se celebra este domingo en Ordes, para evitar que induzan ao voto”.
Presións da Garda Civil
O representante da FGAMT-CIG, Inácio Pavón denuncia tamén as presións directas recibidas da Garda Civil ameazando con que de celebrarse igualmente a manifestación cargarían contra as e os manifestantes. Nese sentido, Regueiro asegura que “nós queremos que sexa unha manifestación na que as veciñas e veciños dos traballadores participen e amosen a súa solidariedade e non imos arriscar a súa integridade”.
Pavós cualifica ademais de “medieval” esta forma de resolver conflitos e denuncia a falta de sensibilidade social da Xunta Electoral, que permite que todos os medios de comunicación fagan seguimento e informen de cómo pasan a xornada de reflexión as e os candidatos, “o que si induce a voto” e, porén, “impide que se visibilice nunha manifestación un conflito que afecta a 8 familias”.
A este respecto considera ademais que, no canto de censurar a mobilización, poderían ter pactado cos traballadores as consignas a corear ou as declaracións a facer no decurso da mesma porque “nós non pretendemos interferir na campaña, senón defender os nosos postos de traballo”.
Nova data de manifestación
Os traballadores decidirán en asemblea a nova data de convocatoria da manifestación, que comunicarán en breve. Adiantan, en todo caso, que o conflito segue e que continuará mentres non se readmita a todos e cada un dos traballadores despedidos e cesen as presións sobre o cadro de persoal. De feito, nos últimos días mobilizáronse na Estrada, Lugo e Ourense.
Denuncian máis unha vez a responsabilidade de Sogama e da Xunta por permitir que se produzan este tipo de comportamentos nunha contrata de transportes que traballa para unha empresa pública.