Bisbarra, 19 de maio do 2023 – O recinto feiral da Semana Verde de Galicia, en Silleda, acollerá en outubro a 23º edición da XGN R Encounter.
A XGN é a maior lanparty de Galicia e ocupará os dous principais pavillóns do recinto feiral. contará coas súas zonas tradicionais, a Intranet e a Extranet, e como é habitual, a tarde previa á inauguración, o 12 de outubro ás 16.00h, abrirá as súas portas de forma non oficial na súa xornada pre-party, para facilitar o acceso escalonado dos/as rexistrados/as.
Os/as participantes poderán usar xa os seus equipos, aínda que será unha xornada destinada sobre todo á realización de traballos técnicos e posta a punto do evento na que se farán probas para garantir a estabilidade da conexión.
En canto á Intranet, orientada a rexistrados/as, permitirá gozar dun posto con conexión de altas prestacións e dereito tanto a acampar como a participar en actividades exclusivas, mentres que a Extranet ofrecerá un completo programa de propostas tanto para os/as participantes como para quen visite o recinto.
Formación, intercambio de experiencias e entretemento volverán ser os eixos desta edición, a sétima coa operadora galega R como colaboradora e patrocinadora oficial e que de novo conta co apoio da Consellería de Política Social e Xuventude da Xunta de Galicia, impulsora da party.
A organización xa comezou a deseñar a cita, que seguirá incorporando melloras no seu obxectivo de converterse na segunda gran lanparty a nivel nacional. Trátase dun reto vinculado ao Grupo Euskaltel e a súa Fundación, a cal celebra desde hai máis de 25 anos no País Vasco a Euskal Encounter, a maior party de España.
Un programa didáctico e divertido
A XGN R Encounter contará con actividades moi variadas tanto para persoas rexistradas como para visitantes que acudan á Extranet. Novidades e propostas xa habituais que contan con gran éxito uniranse nun programa que incluirá competicións, talleres, conferencias, actividades de realidade virtual e tamén os xogos máis diversos.
