Compostela, 25/05/2026 – A senda ciclista e peonil que unirá o Milladoiro, en Ames, con Compostela naceu con mal pe e leva coxeando desde entón. Un trazado que nunca gustou, sucesivas modificacións e agora unha queixa ante a UNESCO.
Sobre todo a senda sobrevoa o informe elaborado por ICOMOS España sobre a compatibilidade do proxecto de mobilidade sostible coa protección da paisaxe cultural de Conxo, no que se conclúe que a alternativa seleccionada pola Xunta “mantén afeccións significativas á paisaxe e ao ecosistema forestal”. Un informe determinante para que a Asociación Conxo Aberto pedira amparo á UNESCO.
No vindeiro pleno ordinario tanto socialistas como non adscritos presentarán iniciativas relativas a este tema. O Grupo Municipal Socialista levará unha moción para esixir á Xunta de Galicia a paralización inmediata das obras da senda ciclista ao seu paso por Conxo e a revisión integral do proxecto neste ámbito, “tras os graves impactos provocados nun espazo de alto valor patrimonial e ambiental”.
O voceiro socialista, Gumersindo Guinarte, advertiu de que a actuación impulsada polo Goberno de Alfonso Rueda está a provocar “unha agresión intolerable sobre un espazo que forma parte da identidade patrimonial e paisaxística de Santiago”, e criticou que a Xunta decidise seguir adiante “ignorando tanto os informes técnicos como o clamor social existente en Conxo”.
Pola súa banda a concelleira non adscrita Mila Castro, defenderá no Pleno unha proposición para que a Corporación exprese o seu respaldo institucional á solicitude de amparo e protección do Paisaxe Cultural de Conxo trasladada pola asociación veciñal Conxo Aberto á UNESCO, así como para impulsar de maneira decidida o Plan Especial de Protección e Rehabilitación de Conxo.
“O proxecto impulsado pola Xunta entre O Milladoiro e San Caetano foi un proxecto errado desde o principio. Levamos máis dun ano advertindo de que este trazado era incompatible coa protección dun espazo de enorme valor patrimonial, ambiental e simbólico para Santiago como é a contorna do Banquete de Conxo e o río Sar”, sinala Mila Castro.
A maiores do problema de Conxo xorprende ver como se constrúe unha senda que en moitos tramos, xa en Compostela, vai paralela ou moi cerca a unha municipal. Un exemplo da falta de colaboración entre administracións que acaba por dilapidar recursos.
