Ames, 19 de febreiro do 2021 – Debido as restricións que se veñen dando a causa da pandemia o concello de Ames decidiu adiar a oferta dos bonos Merc@mes ata o próximo día 1 de marzo.
Estes bonos impulsados desde a concellaría de Promoción Económica de Ames estaba previsto que saíran hoxe 19 de febreiro. O acordo de retrasar a saída foi tomado na Xunta de Goberno Local que aprobou tamén a ampliación do prazo de emprego dos bonos ata o 1 de maio.
Bonos para todo o mundo
O concello ofertará desde o 1 de marzo 3.000 tarxetas dotadas de banda magnética o que permitirá que sexan utilizadas en promocións futuras. Son anónimas e poderán ser mercadas por calquera persoa, residente ou non, maior de 18 anos. 2.000 das tarxetas terán un valor de 50 euros, dos que 20 son aportados polo concello e costarán en consecuencia 30 euros, e 1.000 cun importe global de 100 euros dos que o concello aporta 40. Cada persoa poderá mercar unha tarxeta de cada tipo.
Adquisición e uso
171 establecementos adheríronse á esta campaña coa que se pretende valorizar e impulsar as compras no comercio local. A relación dos establecementos adheridos será publicada na páxina web municipal e na páxina web da entidade colaboradora, XEA.
As tarxetas bono poñeranse á venda na Casa da Cultura de Bertamiráns en horario de 11:00 a 13:30 e de 17:00 a 19:30. No Milladoiro poderanse adquirir polas mañás, entre as 11:00 e as 13:30 no local da Asociación de Empresarios Novo Milladoiro, na rúa Palmeira 19. Polas tardes venderanse na rúa Viorneira 1, no local da Asociación Palmira Boulevard entre as 17:00 e as 19:30 horas.
O Concello ten previsto ademais instalar carpas informativas os días 5 de marzo, na rúa Travesa do Milladoiro e o día 6, na praza da Maía de Bertamiráns.
No caso de non consumir todos os cartos antes do 1 de maio, a mesma tarxeta bono poderase utilizar na segunda fase da campaña que abrangue desde o 1 de setembro até o 31 de outubro. Tanto a adquisición das tarxetas como a realización das compras con ditas tarxetas poderase realizar exclusivamente en estes dous períodos.
