Compostela, 1 de febreiro do 2021 – Dous dias de accións marcan o camiño da hostalería na procura dunha unidade que atope solucións á crise que vive.
O pasado xoves presentaron a Plataforma en Defensa da Hostalaría Galega que buscará constituír o antes posible unha Federación que aglutine ao sector. O venres saían a rúa en Compostela para camiñar ata San Caetano e reclamar un plan de rescate para o sector.
Unidos na plataforma
Na rolda na que se presentou a Plataforma en Defensa da Hostalaría participaron representantes dos tres colectivos impulsores da iniciativa: Hostalaría Compostela, HOEMPO (Asociación de Hostaleiros de Pontevedra, Poio e Marín) e ShOStalaría da Coruña.
Buscan conseguir un instrumento áxil e eficaz para xestionar o actual momento de crise que atravesa o sector. Queren ademais sumar a empresas doutros sectores directamente ligadas aos intereses da hostalaría, como produtoras, provedoras ou distribuidoras.
Buscar unha representación
A plataforma servirá de base para a creación dunha Federación de Hostalaría Galega, que aglutine a empresas con actividades económicas que prestan servizos ligados ao aloxamento e ao servizo de comidas e bebidas.
Un dos problemas cos que se atopou o sector en esta crise foi a falta dunha representación unitaria. A intención da Xunta de dialogar co Cluster do turismo de Galicia foi o detonante para que as distintas asociacións se decataran da necesidade de buscar a unidade.
O obxectivo da Federación será a defensa e coordinación dos intereses comúns do sector, en calquera ámbito onde estes estean presentes, incluso no estatal ou internacional.
Fragmentación
Os representantes da Plataforma que a crise provocada pola deixou en evidencia a fragmentación e debilidade organizativa do sector “Actualmente, impera un sistema de organizacións cun marcado carácter presidencialista, onde a participación por parte das empresas asociadas é escasa ou nula en moitas ocasións”.
A plataforma avoga por unha unidade que sirva de representación do sector, ampla e plural, ante as administracións encargadas da xestión desta situación “Debemos poñer no centro do debate e actualizar o Plan de Rescate presentado en novembro e esixir que esa sexa a guía de actuación por parte das Administracións, as mal chamadas axudas non son a solución ao problema do sector, son un punto máis da nosa
proposta. Esta desinformación é conscientemente posta en valor pola Xunta para intentar agochar a nefasta xestión e falta de iniciativa que ten a respecto deste tema”, engadiron.
Apoio na rúa
Medio millar de persoas relacionadas coa hostalaría en Galicia e un cento de vehículos de empresas distribuidoras e provedoras participaron na manifestación de Compostela.
A mobilización partiu ás 10:15 horas do aparcamento de Santa Marta e dirixiuse aos edificios administrativos da Xunta en San Caetano. Ali reclamaron ao Goberno galego liderar, xunto co sector, ante as administracións competentes as medidas do Plan de Rescate que a hostalaría presentou en novembro.
As asociacións sinalaron que é necesaria unha “urxente liquidez en forma de indemnizacións”, non axudas, para evitar a desaparición de
miles de empresas e, en consecuencia, a perda de miles de postos de traballo. “Sabemos que non son eles os culpables da pandemia, pero son os responsables de buscar unha solución a esta problemática que está acabando cos nosos negocios e co conxunto da economía galega”.
Así mesmo, sinalaron que urxe que as administracións se poñan de acordo xa sobre o instrumento máis áxil para rescatar a un sector que, vítima das loitas partidistas, está ao borde da quebra.
