Compostela, 12 de agosto do 2021 – Un total de 16 asociacións de hostalería de toda Galicia presentaron en Compostela o recurso que elevaron ao TSXG polas restricións impostas desde a Xunta de Galicia.
As asociacións de hostalería pertencen aos colectivos Hostalería Federada Galega (HOSFEGA) e a Plataforma Galega en Defensa da Hostalería. Ambos os dous representan a máis de 4.000 empresas en Galicia.
O recurso, interposto o pasado 6 de agosto e admitido a trámite o día 10, foi anunciado nunha rolda de prensa celebrada polos representantes das empresas firmantes, Lois Lopes (A Nave de Vidán SL), Sergio Fernández (Antealtares Compostela SL), David Dopazo (Noavero SL) e Lucía Vázquez (Bar Bicoca).
O documento é a continuación dunha serie de medidas que pretenden visibilizar a problemática que afecta ao sector da hostalería debido ás limitacións sanitarias. Estas restricións son consideradas polas empresas “desproporcionadas, discriminatorias e non consensuadas”. Neste sentido, argumentan que producen unha “forte criminalización” da hostalería e non aportan “efectividade” para frear a pandemia.
Pola contra, engaden, as restricións na súa actividade producen alternativas de ocio privadas sen ningún tipo de control. O propio conselleiro de Sanidade, na súa comparecencia do 10 de agosto, recoñecíaas como o principal perigo nestes momentos para a proliferación de contaxios. O sector considérase parte da solución, ao igual que xa está acontecendo no Reino Unido, onde despois de eliminarse todo tipo de restricións obsérvase una evolución positiva da pandemia.
Indemnizacións
Na mesma rolda de prensa tamén se reclamou un plan de indemnizacións “real” que cubra as perdas que se producen no sector co obxectivo de manter o número de empresas e os postos de traballo que se xeran.
Lois Lopes indicaba no encontro que “O sector está disposto a estudar medidas de carácter efectivo que nos permitan traballar ao 100% das nosas posibilidades, tanto en limitacións de capacidade como nos horarios que temos establecidos legalmente nas nosas licenzas, de aí que se valore a posibilidade de implantar un pasaporte sanitario modelo Francia que permite ao sector dese país traballar sen restricións”.
En este colectivos están integradas a Asociación de Bares, Pubs e Discotecas de Compostela; Asociación de Empresarios Lugo Monumental; Asociación de Empresarios Beiras de Viveiro; Asociación de Hostelería de Ribeira; Asociación de Hostelería de Moaña; SHOS Hostelería Coruña; APEMER Vigo (Asociación Provincial de Establecimientos Musicales y Espectáculos Reglados); Asociación de Hostelería de Betanzos; AHROU, Asociación de Hostelería e Restauración de Ourense; Asociación de Hostelería Boiro-Rianxo; Asociación de Hostelería de Bueu; ARECA, Asociación de Restauración de Cangas; Asociación de Hostelería de Caldas de Reis; Hostaleiros e Autónomos de Ferrolterra, H.A.F.; AHITUVI, Asociación de Hostelería y Recursos Turísticos de Vilagarcía; HOEMPO, Asociación de Hosteleros de Pontevedra, Poio e Marín
