Bisbarra, 20 de xuño do 2024 – O Museo das Peregrinacións de Compostela acolleu a presentación da edición 2024 da Rapa das Bestas de Sabucedo, que se celberará do 5 ao 8 de xullo.
No acto participaron o Conselleiro de Cultura, José López Campos; o alcalde da Estrada, Gonzalo Louzao e o presidente da Asociación Rapa das Bestas, Paulo Vicente. Todos destacaron como reto máis urxente a declaración da festa como Ben de Interese Cultural, BIC.
O Conselleiro de Cultura, e ex alcalde da Estrada, avanzou a posibilidade de que xusto antes do inicio de esta edición sexa publicado no DOGA o inicio dos trámites previos e necesarios para a declaración como BIC na categoría de patrimonio inmaterial.
López Campos tamén lembrou que a celebración xa é considerada de Interese Turístico Nacional e Internacional e que se trata dunha “tradición sobranceira que forma parte da memoria colectiva de Galicia”
O alcalde da Estrada, Gonzalo Louzao destacou o que supón para o concello a celebración da festa e aproveitou para poñer en valor outros eventos consolidados como a Festa do Salmón ou que cada ano van crecendo como a Festa da Sidra.
Pola súa banda Paulo Vicente destacou un ano máis a resposta da xente, coas entradas do sábado xa esgotadas, e dos medios con centos de xornalistas acreditados, desde países como Estados Unidos, Italia, Francia, Portugal ou Exipto entre outros.
Este ano ademais a Rapa das Bestas entrará nunha plataforma tan innovadora como Twitch xa que o xornalista galego Siro López, dedicado habitualmente a eventos deportivos, intentará emitir desde Sabucedo.
A Rapa leva aparellado ademais un intenso programa de actividades como o Rapa Sons que encherá de música os catro días de festa. Tedes toda a programación na páxina oficial da Rapa.
A Rapa das Bestas de Sabucedo é unha tradición que, segundo a lenda oral, se remonta á segunda metade do século XVI, achegándose así aos 500 anos de vida e manténdose a día de hoxe conxugando o seu espírito e os seus valores orixinais coa evolución en canto a coidado dos animais e do medio ambiente.
Ademais, supón un gran atractivo turístico con repercusión internacional pola singularidade da celebración, sendo a parte do curro, onde confrontan técnica e forza os aloitadores e os cabalos, a que esperta máis interese pola súa espectacularidade.
