A Estrada, 14 de xuño do 2022 – Adventure Galicia organiza coa colaboración do concello da Estrada un raid de navegación no que están inscritos ata o momento 81 pilotos de toda España.
Do 16 ao 19 de xuño estes pilotos tomarán a saída, e chegarán de volta, na Praza da Feira da Estrada. O raid discorrerá polos municipios de Cuntis, Valga, Campolameiro, Cerdedo-Cotobade, Forcarei e Silleda.
Esta será unha das catro competicións anuais organizadas na nosa comunidade puntuables para o Campionato de Navegación Adventure Galicia, nas que se valora a precisión á hora de desprazarse entre as diferentes balizas das que se compón o percorrido ata chegar á meta.
A proba contará con preto de 450 quilómetros en total. Durante o xoves 16 de xuño, a partir das 16.00 horas, terán lugar as acreditacións e as verificacións técnicas. O venres 17 continuarán as verificacións durante a mañá e, a partir das 16.00 horas, sairán os participantes para percorrer a primeira etapa, composta por 80 quilómetros.
O sábado 18, a saída será ás 9.30 horas e deberán completar durante todo o día un percorrido de 220 quilómetros; e o domingo 19 sairán ás 9.30 horas para realizar unha última etapa de 125 quilómetros durante a mañá, que rematará coa entrega de trofeos ás 14.30 horas.
Segundo o nivel de dificultade na navegación, os/as participantes estarán divididos nas Categorías de Turismo, Adventure e Dakar. Entre os corredores atópanse os pilotos estradenses Javier Campos, Manuel Arca e Juan Betetes, primeiro clasificado na categoría Adventure. Ademais, disputarán a proba Joan Pedrero e Eduardo Iglesias, competidores no Dakar.
