Piden que se alegue contra un parque de eólicos que se pretende situar sobre terreos cunha DIA negativa xa emitida.
Á intención, por parte da industria, de instalar parques eólicos en zonas sensibles, xa sexa por razóns medioambientais, patrimoniais ou ámbalas dúas é unha realidade. O que se denuncia na Estrada vai un paso máis alá xa que os terreos recibiran xa unha Declaración de Impacto Ambiental, DIA, negativa.
O BNG da Estrada levará ao pleno de hoxe unha moción de urxencia na que solicita que se presenten alegacións contra o proxecto do parque eólico Ventoburgo. Trátase dun proxecto que presenta a empresa Caoba Wind, SL., de 59,85 MW, e polo tanto de tramitación estatal, e situado nos montes de Cabanelas, parroquia de Liripio, onde se colocarían até seis aeroxeradores.
Os nacionalistas destacan do proxecto eólico de Ventoburgo que colocaría parte da infraestrutura en parte da zona onde a Xunta de Galicia emitiu no seu día unha Declaración de Impacto Ambiental negativa a outro parque eólico.
Aquela DIA negativa consideraba que a actuación proxectada non era ambientalmente viábel, vistos os informes de Patrimonio e outros organismos. O BNG considera que este dato, unido ao valor paisaxístico, cultural e patrimonial, é suficiente como ara presentar alegacións.
O Bloque lembra que o goberno municipal xa alegou en outras ocasións alegou a proxectos eólicos que atentaban contra o medio ambiente e o modo de vida dos veciños e veciñas. Por este motivo, instan a PP, PSOE e Móvete a apoiar a moción que pide ao goberno municipal “presentar alegacións para frear este proxecto depredador, que atenta contra o noso territorio”.
O BNG engade que este proxecto se presenta xunto a outros catro parques eólicos que presentan un total de cinco empresas diferentes. O destacable é que todas elas teñen o mesmo domicilio social. Para os nacionalistas “Este feito pode ser moi legal, mais demostra o que tantas veces temos denunciado desde o BNG, que estamos ante un espolio de libro, que neste caso xa actúan con total descaro”.
