Bisbarra, 4 de setembro do 2023 – Un informe da inspección de traballo desvela graves irregularidades no servizo de axuda ao fogar, SAF, no concello da Estrada.
A empresa concesionaria do SAF incumpre o prego de condicións e o convenio colectivo en cuestións como o descanso semanal ou o computo de horas de traballo efectivo. No caso de que as traballadores decidiran presentar demanda nos xulgados isto suporía para a empresa importantes sancións económicas.
O BNG da Estrada ven de instar ao concello para evitar as consecuencias de esas posibles denuncias. Os nacionalistas explican ademais a situación de precariedade da concesión. Outorgada en 2015, por un importe de máis dun millón de euros, o prazo máximo de prórrogas rematou en 2019 se que se sacara a licitación desde entón.
O Bloque pídelle ao goberno municipal que actúe “e non sexa cómplice dunha situación que afecta a un servizo público esencial do noso concello. Por unha parte ten que mediar coa empresa e as traballadoras para solucionar as graves deficiencias detectadas. Por outra banda, instamos ao goberno municipal a sacar un novo concurso do SAF que garanta unha boa calidade no servizo, así como cumprir os dereitos laborais das traballadoras”.
En todo caso, desde o BNG consideran que a mellor opción é a municipalización do servizo. “Como se está a ver, a privatización poderá implicar menos traballo para o alcalde e os concelleiros e concelleiras de goberno, que cobran dedicacións exclusivas moi cuantiosas, pero resulta nefasto para os intereses das traballadoras e dos usuarios e usuarias do servizo de axuda no fogar, unha das pezas claves do estado do benestar no noso concello”.
