Bisbarra, 28 de setembro do 2022 – O concello da Estrada ven de anunciar a construción dun heliporto na parcela situada ao carón do centro de saúde.
O alcalde da Estrada, José López, explicou que o heliporto servirá “para facilitar a aterraxe e o despegue do helicóptero do 061 nun lugar estable, evitando perder tempo na procura dun terreo cando se desprace á Estrada por algunha emerxencia”.
O investimento previsto é de 26.000 euros. A obra que sairá a licitación contempla a construción dunha plataforma, na zona da Baiuca ao carón do centro de saúde, e a creación dunha pasarela que comunique a plataforma coa entrada de Urxencias.
O rexedor local destacou que este proxecto, que atende ás demandas do persoal sanitario do centro de saúde da Estrada e mais ás do propio 061, “amosa unha vez máis a aposta do goberno local por mellorar o acceso ás emerxencias de toda a nosa veciñanza”. Ademais, precisou que os técnicos municipais levan meses traballando nesta proposta pero o procedemento estivo paralizado á espera de obter os permisos necesarios do Ministerio de Transportes, Mobilidade e Axenda Urbana pola súa proximidade á estrada N-640. O alcalde lembrou que “o compromiso do goberno local coa mellora dos servizos sanitarios” verase reflexado tamén coa substitución da actual ambulancia municipal do Servizo de Emerxencias da Estrada por outra nova, para o que se adicarán 75.000 euros “co obxectivo de seguir mantendo un servizo básico e fundamental para a veciñanza, complementario ao do 061, e que realiza preto de 1.300 intervencións ao ano”.
