Bisbarra, 18 de xullo do 2022 – O Festival As nosas Músicas volve a Couso e celebrará en este 2022 a súa vixésimo quinta edición os días 13 e 14 do vindeiro mes de agosto.
A parroquia de Couso acollerá de novo esta cita tras dous anos de parón pola pandemia. A presentación do XXV Festival As nosas Músicas correo a cargo do alcalde da Estrada, José López, que estivo acompañado polos representantes da Asociación A Xesteira Iván Magariños, Xermán Alexandre Muíños e Alejandro Brey.
Na súa intervención López destacou o labor das persoas que forman parte da organización dun evento destas características “para conseguir manter ano tras ano esta festa e axudar a que A Estrada sexa un dos referentes culturais a nivel galego”.
Pola súa banda, Xermán Alexandre Muíños quixo agradecer a colaboración do Concello da Estrada “e mais a de arredor de 100 empresas, na súa meirande parte estradenses” para que esta celebración continúe consolidándose. Tamén destacou que este “será o primeiro ano que haberá dous días de festa”, cunha importante participación das agrupacións musicais da zona, e avanzou que o premio “As Nosas Músicas” desta edición será entregado a Emilio Españadero, presentador do programa da Radio Galega “Lume na Lareira” e antigo compoñente de varias agrupacións de música tradicional, “polo seu traballo a prol da cultura”.
As actividades programadas arredor do festival As Nosas Músicas darán comezo o sábado 13 de agosto, cun obradoiro de baile con perspectiva de xénero e unha ruada a partir das 19.00 horas na que participarán as seguintes agrupacións musicais: Ultreia, Aldomir, A Ponte Vella e Doner e os Kebabs.
Na xornada do domingo 14 haberá actividades durante todo o día. Ás 14.00 horas terá lugar unha sesión vermú coa actuación do grupo Campantes da Braña. Xa pola tarde, a partir das 17.00 horas, haberá xogos tradicionais para todas as idades, un obradoiro de iniciación ao baile tradicional e unha mostra sobre a personaxe de Barriga Verde. A festa rematará ás 21.30 horas coa entrega do premio “As Nosas Músicas” a Emilio Españadero e a celebración do festival, que contará coa actuación das seguintes agrupacións: Leilía, Alvariza, Airiños da Freba, Art-Monium e Ailá.
Paralelamente aos citados actos, a festa contará cunha zona gastronómica con tres postos de comida, aparcadoiro e zona de acampada. Ademais, haberá servizo de autobús de balde que sairá ás 21.00 horas dende A Estrada (A Farola) ata Couso e voltará dende Couso ás 4.30 e ás 6.30 horas da madrugada, con paradas en Pontevea e A Estrada (A Farola).
