Bisbarra, 12 de xaneiro do 2023 – Seguen aparecendo proxectos de parques eólicos na bisbarra que provocan a oposición da veciñanza, en este caso do de Campo das Rosas na Estrada.
O BNG estradense demanda que o alcalde realice todas as xestións necesarias para que Campo das Rosas non se instale no concello. O candidato nacionalista Xoán Reices di que “A aprobación por parte da Xunta do declaración de impacto ambiental do parque eólico do Campo das Rosas é un duro golpe para o noso concello”.
Reíces engade que “ afectará gravemente, xa non só ao medio natural de Sabucedo senón a unha tradición e a unha festa declarada de interese turístico internacional, que ademais está en fase de ser declarada BIC”.
Non é o único proxecto eólico para o concello da Estrada xa que tamén ven de ser aprobado o de Castro Valente, con importantes xacementos arqueolóxicos como xa temos contado en Lindeiros. O BNG critica que o concello vaía camiño de estar rodeado de parques eólicos “ dos que o concello e a veciñanza non tirarán partido algún”.
O BNG esixe un pronunciamento claro do alcalde e do grupo de goberno. Reices explica que “até agora o alcalde nunha posición cómoda de oposición aos parques, pero sen facer moito ruído, sen facer moita oposición, en especial aos parques cuxa aprobación estaba vinculada á Xunta”.
Reices afirma que “non valen as medias tintas, o goberno municipal ten que traballar para impedir a instalación do parque eólico de Sabucedo e o do Castro Valente. Desde logo o BNG non vai ficar parado mentres se enchen os nosos montes e se acaba cunha das nosas tradicións máis singulares”.
“Por outra parte”, indica o candidato do BNG, “a asociación da Rapa das Bestas ten todo o noso apoio nas medidas que impulsen para evitar a instalación do parque eólico do Campo das Rosas e conta con toda a nosa colaboración”.