Bisbarra, 27 de xullo do 2022 – A Estrada presenta a conta xeral do 2021 que da un resultado de máis de tres millóns de euros de remanente ao peche do exercicio.
A Conta Xeral será levada esta tarde á Comisión de Facenda. O edil responsable, Alberto Blanco, puxo en valor “a capacidade de xestión do goberno local para conseguir recursos extraorzamentarios”.
Grazas a eses recursos extraordinarios o orzamento inicial de 13,7 millóns acadou os 30.943.053,67 euros. Blanco subliña que “o esforzo do Concello para mellorar as infraestruturas públicas permitiu acadar a cifra récord de 14,9 millóns de euros de investimento”.
A remodelación da Praza da Feira, o cambio das luminarias do rural, a peonalización de varias rúas do casco urbano ou os asfaltados dos viais das parroquias foron algunhas das obras levadas a cabo. Esta inversión repercutiu tamén no valor patrimonial do concello que aumentou en 1,7 millóns de euros.
Remanente de 3 millóns de euros
A Conta Xeral reflicte tamén un remanente ao peche do 2021 de 3,02 millóns de euros. O edil de facenda destaca a capacidade de aforro que demostran estas cifras. Grazas a isto, serán empregados durante este ano 1.143.100 euros dese remanente a través do recoñecemento de crédito extraordinario e incrementando o xa existente para mellorar infraestruturas, apoiar iniciativas locais e acometer actuacións imprevistas que respondan ás demandas da veciñanza.
A Asociación de Comerciantes da Estrada (ACOE) recibirá unha aportación extraordinaria de 135.000 euros, que se vén concedendo dende o ano 2020 co obxectivo de apoiar iniciativas como o Mercado de Verán ou as campañas do Nadal que fomenten o comercio local no municipio.
Tamén se contempla dedicar 98.000 euros para posibles adquisicións de terreos por parte do Concello; outros 255.500 euros irán dedicados á mellora de infraestruturas viarias tanto no rural como no casco urbano da Estrada; e 5.000 euros destinaranse a mellorar a instalación do aire acondicionado na Escola Infantil A Galiña Azul.
A maiores, tamén se incrementarán partidas xa contempladas no orzamento anual como 30.000 euros para mellorar as instalacións dos distintos centros educativos; 150.000 euros co obxectivo de financiar actividades culturais e festexos populares; 85.000 irán dedicados a facer fronte a posibles imprevistos nas obras de construción da pista de atletismo; 17.000 euros empregaranse para a organización e a promoción de eventos e campañas que visibilicen aos produtores locais; 20.600 euros dedicaranse para o pago da sinalización de rutas turísticas; e 120.000para facer fronte aos gastos de subministración nas vías urbanas e rurais.
“Sempre nos caracterizamos por ser prudentes e asegurar a sostenibilidade financeira ante as malas previsións de cara ao futuro derivadas da situación económica adversa que estamos a atravesar, por este motivo quedarán dispoñibles dous terzos do remanente que garantirán a nosa solvencia para poñer en marcha novos proxectos no futuro”, asegurou Alberto Blanco.