Ordes, 23 de maio do 2019 – A CIG vén de gañar as eleccións sindicais celebradas entre o persoal laboral do Concello de Ordes, acadando tres dos cinco representantes do comité de empresa.
Dende a CIG Administración destacan a elevadísima participación nas votacións sindicais, que acadou o 100% no colexio de técnicos e chegou ao 80% no de especialistas. Este resultado, engade a CIG Administración, racha coa maioría no órgano de representación que durante os últimos anos tivo a CSIF “que neste tempo non fixo acción sindical e limitouse a actuar como unha prolongación dos gobernos municipais” en palabras do sindicato gañador. Esta é unha das razóns, ao entender da central nacionalista, que explica a altísima participación do persoal laboral nestas eleccións, nas que no colexio de especialistas a candidatura da CIG obtivo 29 votos fronte aos sete logrados pola lista da CSIF.
Os delegados e delegadas da CIG reafirman o seu compromiso por cambiar a situación e comezar no Concello de Ordes “a facer sindicalismo de verdade”. Entre outras cuestións márcanse como traballo prioritario para os próximos catro anos a renovación da RPT, a posta en marcha da negociación do convenio colectivo ou a consolidación de emprego, “xa que non hai nada feito a causa da desidia da CSIF”.
Este éxito entre o persoal laboral súmase ao resultado obtido nas eleccións do persoal funcionario, onde a CIG, por terceiro mandato consecutivo, volver lograr o único representante que se elixe.
