A Baña, 27 de decembro do 2021 – O novo equipo de goberno da Baña segue os pasos de outros concellos e organiza unha San Silvestre festiva para o 31.
A San Silvestre na Baña non terá carácter competitivo. Serán catro kilómetros de percorrido co obxectivo de fomentar hábitos saudables combinando a práctica deportiva e a diversión.
Desde o concello anímase a todas as persoas participantes a que acudan disfrazadas á saída, programada para as 17.00 horas dende a Praza do Concello.
As persoas interesadas en correr esta I San Silvestre da Baña deberán inscribirse previamente mandando un correo a deportes@concellodabana.gal ou un WhatsApp ao número de teléfono 669 368 413. Nas súas mensaxes terán que facer constar nome, apelidos, DNI e número de teléfono. Os menores de 12 anos deberán correr na compaña da súa nai, pai ou un/ha titor/a.
Seguindo as recomendacións fronte a Covid 19, a saída efectuarase coa máscara posta e só poderá baixarse unha vez se logre manter a distancia interpersoal de metro e medio co resto das/os corredoras/es. Dende a organización da carreira, lembráselle ás persoas participantes que se aplicarán os protocolos de seguridade establecidos polas autoridades sanitarias en función da evolución da pandemia e que terán que cumprir en todo momento coas recomendacións establecidas para eventos e actividades deportivas.
