O alcalde da Baña, José Antonio Pereira, reuniuse cos madeireiros para tratar do desenvolvemento da nova normativa de cortas aprobada en pleno o pasado mes de abril.
O alcalde da Baña, José Antonio Pereira, na compaña do concelleiro de Obras, Urbanismo e Medio Rural, Jesús Manuel Pena, reuniuse na Casa Consistorial cos empresarios madeireiros que operan no municipio.
A xuntanza centrouse no desenvolvemento da ordenanza municipal sobre a corta de árbores, aprobada en pleno en abril, e aproveitouse tamén para presentar o garda rural que se encargará de velar polo seu correcto cumprimento.
A modificación da norma ten o obxectivo principal de minimizar os danos nas vías públicas e mellorar a xestión ambiental das cortas. Entre os cambios destacan a obrigatoriedade de comunicar as tallas das árbores con 15 días hábiles de antelación cando superen as cinco toneladas e o establecemento de licenzas bianuais para as tarefas de depósito, carga e transporte de madeira.
Fíxanse tamén fianzas obrigatorias de 1.600 euros para vehículos de menos de 16 toneladas e de 3.100 euros se os vehículos teñen 16 toneladas ou máis. A persoa responsable da limpeza das vías e dos posibles danos causados nas mesmas será quen realice a talla e/ou a persoa propietaria, enfrontándose no caso de incumprimento das normas a sancións que oscilan entre os 300 e os 1.500 euros en función da súa gravidade.
