Bisbarra, 6 de marzo do 2023 – A Agrupación Socialista da Baña ven de presentar unha queixa ante a Valedora do Pobo polo incumprimento de acordos plenarios do goberno municipal.
Os socialistas din que “os incumprimentos de acordos plenarios son constantes”. A queixa presentada ante a Valedora refírese en concreto á composición das mesas de contratación.
O concello da Baña aprobaba no pleno municipal de 8 de xaneiro do 2020 unha moción de Compromiso por Galicia sobre a participación de todos os partidos nas mesas de contratación. A moción foi aprobada finalmente por maioría simple, cos votos de Compromiso e Partido Popular, actuais compoñentes do goberno municipal.
O actual goberno municipal formouse tras unha moción de censura en decembro do 2021. Dase polo tanto a circunstancia de que Compromiso por Galicia está incumprindo unha moción presentada por eles mesmos.
O acordo consistía na incorporación ás mesas de contratación do Concello da Baña, de dous membros dos distintos partidos políticos con representación no Concello. E que os tres partidos irían rotando na súa presenza nas mesas de contratación.
Os socialistas denuncian que, nos últimos catro procesos de licitación, ignorouse dito acordo e na composición das mesmas, so participaron representantes do PP e CXG, cando debería rotar a composición, tal e como se recolle no acordo plenario do 08/01/2020.
No escrito presentado ante a Valedora do Pobo a Agrupación Socialista solicita que se medie para que o concello responda por que non se respecta o acordo plenario e que se restableza de forma inmediata a orde da composición das mesas de contratación.
