Bisbarra, 29 de novembro do 2024 – O concello da Baña celebrou un pleno este pasado mércores no que impostos como o do lixo, o IBI, o IAE ou o ICIO foron os protagonistas principais.
Aprobouse por unha banda a subida do recibo do lixo nun 10%. Queda a suba moi afastada do 50% imposta por SOGAMA xa que o goberno considera que é inasumible para a veciñanza. O alcalde, José Antonio Pereira, volveu criticar con dureza o forte incremento do canon que aplicará a Xunta a partir do ano que ven pola recollida de lixo. Sogama pasará de cobrar 66 euros por tonelada a fixar unha tarifa de 95 euros, despois do desconto de 12 euros que aplica a Xunta.
“Buscaremos recursos por outras vías para compensar o déficit desta taxa”, asegurou Pereira Gil para xustificar a proposta do equipo de goberno. O informe da secretaría e intervención recoñece que con esta subida a taxa só cubrirá a metade do custe do servizo. A proposta foi aprobada cos 6 votos a favor do equipo de goberno (PSdeG e BNG) e os 5 en contra do PP.
Doing Business Galicia
Na sesión tamén se acordou por unanimidade modificar as ordenanzas reguladoras da contribución (IBI rústica e urbana), de actividades económicas (IAE) e de construción (ICIO) adaptándoas ao convenio Concellos Doing Business Galicia asinado entre Xunta e Fegamp.
Este acordo ten como obxectivo o fomento do emprego e favorecer o asentamento de empresas no polígono industrial e noutras zonas do municipio para crear postos de traballo.
Ademais de actualizar as tarifas e favorecer os descontos a aquelas iniciativas que xeren postos de traballo na Baña, con esta medida o Concello poderá recibir máis subvencións doutras administracións.
Cemiterio de San Mamede do Monte
Por unanimidade aprobouse bonificar o imposto de construcións dos panteóns de San Mamede do Monte, como solicitaba a Asociación de Veciños Outeiro. Tamén co voto favorable de todos os concelleiros e concelleiras ratificouse o convenio de cesión de terreos para a mellora do primeiro treito do Camiño de Monelos.
Reclamacións á Xunta
As tres moción presentadas no pleno, unha por cada grupo políticos, foron aprobadas por unanimidade. O grupo socialista volveu denunciar a discriminación que está a manter a Xunta de Galicia coa Baña, ao non incluír ningunha obra nos orzamentos autonómicos, e presentou unha moción na que lle pide ao Goberno galego que inclúa nos orzamentos de 2025 sendas partidas para executar o saneamento nas parroquias de Troitosende e de San Cibrán e unha partida para urbanizar o polígono industrial.
A moción en defensa da lingua galega presentada polo BNG reclámalle á Xunta diferentes accións para defender o noso idioma como patrimonio colectivo de incalculable valor e poñer en marcha medidas que permitan darlle a volta a situación actual (cada vez menos xente fala a lingua propia). A moción tamén recolle que o Concello da Baña se adhira á Plataforma Queremos Galego.
O Partido Popular presentou unha proposta con motivo do 25N na que se solicita ao Concello da Baña, á Xunta e ao Goberno central por en marcha diferentes iniciativas para acabar coa violencia contra as mulleres.
