Bisbarra, 30 de xaneiro do 2023 – O pleno ordinario do concello da Baña aprobou dous recoñecementos extraxudiciais de crédito para pagar facturas do ano pasado.
O grupo socialista criticou estes recoñecemento que supón cerca de medio millón de euros en gastos. Lembraron que hai un ano, cando gobernaban, foron criticados por que as facturas supuxeron daquela 270.000 euros.
O voceiro socialista, José Antonio Pereira, explica nun comunicado que “este ano de mandato do bipartito, a débeda multiplicouse por 2. Pasou de 270.000 €, a preto de medio millón de euros, o dobre”, e cualifica ao goberno de PP e Compromiso de “incompetente”.
O Psoe fala de “convenios pantasma” que supoñen un incremento dun 150% en publicidade e que segundo o secretario municipal “non existen nin hai nada firmado por parte do Concello”
Os socialistas critican ademais que moitas das facturas son de empresas de fora do concello “Mercan bolígrafos, e lapis por valor de 223 €, material de oficina por preto de 400 €, todo nunha empresa de fora da Baña, tendo unha librería a escasos 100 metros de aquí. Flores en empresas de Santa Comba, material de limpeza en empresas de Santiago, e levan a reparar os vehículos e a maquinaria a talleres de fora do Concello. Xa llo explicará os comerciantes locais”.
Pereira engade que “a todo isto hai que engadir os 74.000 € que lle debe o Concello da Baña á Mancomunidade do Tambre da anualidade 2022, e os 390.000 € dun préstamo do que non se amortizou nin un só céntimo”.
O goberno fala de falta de tesourería
O alcalde, Andrés García Cardeso, replicou que Pereira Gil deixara o Concello sen tesourería por “non saber xestionar a subvención do IDAE e pagar case medio millón de euros en vez de utilizar un endoso. O Concello pagou, pero aínda non cobrou ese medio millón, polo que estamos sen fondos para pagar esas facturas” que forman parte dos dous expedientes aprobados no Pleno. Cardeso non respondeu ao incremento do gasto denunciado polo Psoe.
Os expedientes foron aprobados cos votos a favor do PP e de Compromiso A Baña e a abstención do Psoe.
Na sesión tamén tomou posesión como concelleiro Álvaro Silva Suárez, que se incorpora ao grupo socialista tras a dimisión como concelleira de Mónica González.
