займ срочно

A Baña refórzase colaborando con outros concellos

0

Bisbarra, 22 de marzo do 2024 – O pleno ordinario da Baña aprobou dous convenios de colaboración con distintos concellos para solicitar axudas do INEGA e contratar persoal de orientación laboral.

O pleno comezou cun minuto de silencio pola muller asasinada en Ribeira

No primeiro caso A Baña súmase ao acordo de colaboración no que participan Negreira, Val do Dubra, Brión e Paderne. O obxectivo é facilitar a contratación dos servizos xurídicos e técnicos para mellorar a planificación enerxética e a contratación das subministracións así como promover o aforro enerxético. En concreto estes concellos  solicitarán en conxunto unha axuda do INEGA para contratar unha asistencia técnica na licitación do alumeado público.

Por outra banda aprobouse o convenio de colaboración entre os concellos de Negreira e A Baña para a contratación de persoal técnico de orientación laboral, co obxectivo de promover a inserción laboral e a orientación profesional na comarca. O alcalde, José Antonio Pereira, destacou a importancia da colaboración interinstitucional para obter recursos e financiamento, subliñando que “esta alianza entre concellos é fundamental para impulsar proxectos de interese común”.

Este convenio implica a solicitude dunha subvención á Consellería de Promoción do Emprego e Igualdade da Xunta de Galicia, cun montante de 28.000 €, que representa o 71% do custo total do servizo. Dos 11.441 € restantes, o Concello de Negreira contribuirá cun 80% da achega, mentres que o Concello da Baña contribuirá co 20% restante, que supón 2.288 €.

Día Internacional da Muller

Ademais, aprobouse unha declaración institucional polo Día Internacional da Muller, 8 de marzo, que foi consensuada polos tres grupos políticos e lida no pleno polo concelleiro Alberto Blanco. A declaración destaca o compromiso do Concello en promover a igualdade de xénero, loitar contra a violencia e crear unha sociedade máis inclusiva.

Entre os compromisos asumidos resalta a promoción de plans de conciliación, modelos alternativos de coidados e a inserción laboral das mulleres no tecido económico local. Tamén incrementar a colaboración coas asociacións de mulleres do municipio para promocionar a igualdade en todos os ámbitos e promover a adhesión dos negocios locais ao Protocolo de actuación contra as violencias sexuais e LGTBIfóbicas.

Outros temas

A moción presentada polo Partido Popular sobre a normativa dos galiñeiros de autoconsumo foi aprobada cos votos a favor dos 5 edís do PP e a abstención de PSdeG e BNG. A moción insta ao Goberno a modificar o decreto que establece as normas básicas de ordenación das granxas avícolas, co obxectivo de suprimir a obrigatoriedade de rexistro das explotacións avícolas para autoconsumo. O PSdeG abstívose por considerar que está “fóra de tempo”.

A este respecto, José Antonio Pereira aclarou que “dende o Concello estamos colaborando cos veciños para axudarlles a facer ese trámite de inscrición no rexistro de explotacións “. Mónica González (BNG) tamén se abstivo argumentando que “chega tarde”, ao tempo que recordou que é “unha norma que invade competencias galegas e non se axusta á nosa realidade “.

A moción do PP sobre o apoio ao sector gandeiro foi aprobada por unanimidade. Na mesma, denúnciase o aumento da carga burocrática para o sector e esíxese unha moratoria da normativa europea.

Na parte de rogos e preguntas tratáronse diversos temas de interese para a veciñanza, como os labores de mantemento e limpeza de camiños e zonas do concello, así como a axilización dos trámites de dependencia en Servizos Sociais.

Share.

Comments are closed.

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies