Bisbarra, 24 de maio do 2024 – A Baña reclama da Xunta que poña solucións a escasez de prazas no Punto de Atención á Infancia, o PAI, xa que seis familias quedaron fora este ano.
Para o vindeiro curso, seis menores non teñen sitio no PAI que atende a crianzas menores de 3 anos. A tenente de alcalde, Mónica Gonzalez, asegura que “Estamos desamparados. A Xunta non nos concede máis prazas e non vemos alternativa para estas familias. Esta é unha competencia da Xunta, e na Consellería de Política Social nin contestan ás nosas peticións”
O actual PAI da Baña non ten capacidade para máis prazas que as 20 existentes. Sería necesario ampliar o edificio ou habilitar outro local para unha casa niño, “pero a Xunta non está autorizando casas niño nos municipios que xa teñen PAI.
A concelleira engade que “O peor disto é que quen ten a competencia nesta materia, que é a Consellería de Política Social, nin aporta solucións nin contesta ás nosas peticións”. Mónica González é consciente de que para asentar poboación no rural son precisos servizos esenciais como o do PAI para que as familias poidan conciliar. “Onde está a política que favorece o rural?”.
González Blanco lembra que o Concello da Baña está a afrontar uns gastos de “150.000 euros anuais para o mantemento do PAI, dos que a Xunta tan só aporta 25.000 euros, cando a competencia para ofrecer este servizo é do Goberno autonómico, non do Concello”, afirma.
O problema xa se viviu este curso no PAI da Baña e para o que comeza no mes de setembro a situación segue igual. Das 20 prazas que ten o PAI, 10 están ocupadas por nenos e nenas que renovan matrícula, 1 queda en reserva para posibles emerxencias sociais “e para as 9 restantes tivemos 15 peticións só de familias da Baña, ademais doutras 5 procedentes doutros municipios”.
A tenente de alcalde é consciente da problemática. “Na Baña non temos sitio, e nos concellos limítrofes tampouco hai prazas libres. Que facemos con estas familias? Nós analizamos posibles alternativas con persoal técnico especializado na materia e non vemos unha saída clara. A Xunta é a que debe solucionar este grave problema e habilitar fórmulas que nos permitan atender, polo menos, as necesidades do noso concello”, asegura.
Nos vindeiros días, Mónica González vai convocar as familias para tentar buscar unha solución que, a día de hoxe, ve complicada, porque dende a Xunta de Galicia “non nos dan resposta ningunha”.
