Obradoiros sobre as figuras florais, música tradicional e un xantar ao carón do río Albariña, para celebrar unha das festas tradicionais do concello da Baña
Este domingo, 11 de maio, a Praza do Concello da Baña converterase nun fervedoiro de cor, tradición e convivencia coa celebración da Festa dos Maios 2025. Unha cita pensada para todas as idades que convida á veciñanza a participar nun día de creación colectiva, música, baile e cultura galega.
A festa arrincará ás 10:00 h coa elaboración dos maios baixo o asesoramento do artista Oli Xiraldez, quen guiará ao público ao longo da mañá en obradoiros abertos para dar forma a estas emblemáticas figuras florais.
Consulta en Lindeiros todas as novas sobre o concello da Baña
Ás 12:00 h terá lugar a actuación da Escola de Música Tradicional da Baña, poñendo banda sonora á mañá coa súa proposta tradicional. Ao mediodía, a festa trasladarase á área recreativa do río Albariña para celebrar un xantar veciñal ao aire libre, no que cada participante poderá levar a súa comida, e no que o Concello ofrecerá tamén uns aperitivos como mostra de agradecemento á veciñanza.
Pola tarde, ás 17:00 h, será a quenda do espectáculo Os Monifates, unha proposta única liderada por Alberto Millán Betanzos e Xosé Piñeiro Pérez. Estes dous artistas, cunha dilatada traxectoria, recuperan as marionetas danzantes da tradición galega combinándoas coa música en directo e o seu característico carromato. Desde 2015 levan alegría polos camiños de Galicia cunha proposta chea de creatividade, baile e cultura popular.
Ao longo de toda a xornada haberá espazo para a participación activa en obradoiros, actuacións musicais e momentos para o encontro e a celebración colectiva, poñendo en valor o patrimonio cultural da Baña e da Galicia máis viva.
En caso de choiva, a celebración trasladarase ao Centro Social San Vicenzo.
