Bisbarra, 20 de xaneiro do 2023 – Un ano máis A Baña prepara a festa da Filloa da Pedra que se celebrará o 12 de febreiro como antesala do Entroido 2023.
Son xa 19 anos de actividades arredor da Filloa da Pedra, produto emblemático da Baña. O pavillón de San Vicenzo acollerá esa fin de semana unha programación musical e de ocio na que os produtos empregados serán 100% ecolóxicos.
A Asociación Filloas da Pedra da Baña e o Concello organizan a cita, en colaboración co Consello Regulador da Agricultura Ecolóxica de Galicia (CRAEGA). A participación desta última entidade enmárcase na aposta polo emprego de produtos ecolóxicos na festa, facendoa máis sostible, saudable e atractiva.
A programación comeza o sábado coa saída desde a praza do Concello dun pasarrúas a cargo da Banda de Música do Ateneo de Negreira, que tamén protagonizará ás 16:15 horas un concerto no polideportivo de San Vicenzo.
Un pouco antes, ás 16:00, levarase a cabo a inauguración oficial da Festa, na que se poderán degustar filloas da pedra da Baña e filloas de Muimenta, reafirmando unha colaboración que se estende desde hai varias edicións da actividade.
A música continúa ás 17:00h cunha foliada filloeira e, ás 20:00, co espectáculo protagonizado pola Orquestra Finisterre.
A actuación da Orquestra Olympus é o grande atractivo do domingo 12, día principal da Festa da Filloa da Pedra. O afamado conxunto comezará a actuar ás 19:00 horas e durante o descanso do concerto dispararanse fogos artificiais. Mais a programación dominical comeza moito antes. A festa abre ás 10:00 e, xa ás 12:00, acollerá a actuación dos Campantes da Baña. Ás 13:00 está prevista a lectura do pregón. Pola tarde, a charanga Os Atrevidos amenizará o recinto desde as 15:30 horas.