Bisbarra, 17 de febreiro do 2025 – A Festa da Filloa da Pedra da Baña xa ten banda sonora grazas á peza composta por Caxade, pregoeiro da XXI edición.
Di a cantiga de Alonso Caxade “Lume a pedra, festa rachada, viva A Baña, Filloa dourada” estreada no comezo do pregón. Con este tema, que lle cede ao Concello, o que fora mestre na unitaria de Lañas e primeiro premio Daniel García Barros súmase a iniciativa para solicitar a declaración de Festa de Interese Turístico para a Festa da Filloa da Pedra da Baña.
Miles de persoas achegáronse durante toda a xornada deste domingo ata a Baña para participar nos numerosos actos organizados para celebrar a vixésimo primeira edición da Festa da Filloa da Pedra, que o Concello fai coincidir co comezo da tramitación do expediente para solicitar a declaración de Festa de Interese Turístico de Galicia para esta celebración tradicional.
Caxade non dubidou en asegurar que lle cedía esta canción ao Concello para promocionar a Festa da Filloa da Pedra, como lle pedira a tenente de alcalde Mónica González Blanco. Ao rematar o pregón, Mónica González e o alcalde, José Antonio Pereira, regaláronlle a Caxado unha pedra de granito para que poida facer filloas na casa.
En San Vicenzo servíronse preto de 10.000 filloas que prepararon voluntarias e voluntarios durante a fin de semana, moitas delas en directo nas 30 pedras colocadas no pavillón de San Lourenzo.
Moitos dos visitantes asinaron para solicitar que a Festa da Filloa da Pedra sexa declarada de interese turístico de Galicia, unha petición que tamén apoiou expresamente a portavoz do BNG do Parlamento galego, Ana Pontón, que se achegou ata a Baña e se animou a facer filloas e conversar coas voluntarias.
Na festa tamén estiveron presentes os alcaldes de Val do Dubra, Diego Díaz; e o de Santa Comba, Alberto Romar, así como concelleiros dos tres grupos políticos da Corporación da Baña. Os actos comezaron ás dez da mañá coa ruta ciclista da filloa, na que máis de medio cento de persoas percorreron dez quilómetros polo municipio bañense.
Integrantes da Escola de Música Tradicional da Baña iniciaron ao mediodía o apartado musical cunha concorrida e aplaudida actuación antes do pregón de Alberto Caxade. O trío Alborada encargouse da sesión vermú, mentres a Asociación de Familias do CPI San Vicente organizaba un taller de estampado de camisetas para a cativada.
O mercado de artesanía e a demostración de artesanía en vivo animou a mañá dunha festa que contou coa presencia de medios de comunicación autonómicos e nacionais. Durante o xantar, as persoas asistentes puideron degustar filloas da pedra, orella e chourizo no pavillón, ou por degustar polbo na carpa situada ao seu carón.
Xa pola tarde, os grupos 7 Ferrados e Os Carunchos animaron a sobremesa, antes e despois da presentación do libro ‘Ben mantidos’, de Xavier Castro Pérez. O colofón a esta festa multitudinaria púxoa o concerto de Fillas de Cassandra.
