Voluntarias e voluntarios facendo filloas da pedra
Xa está todo preparado no Concello da Baña para que este domingo, 8 de febreiro, a XXII Festa da Filloa da Pedra volva postularse como un dos referentes gastronómicos de Galicia. Ante as previsións meteorolóxicas, a mensaxe é de tranquilidade: a festa non só segue adiante, senón que o fai reforzando a súa loxística para que o público poida gozar de toda a programación.
Co obxectivo de garantir a comodidade das persoas asistentes, a organización ten todo preparado para que a festa se desenvolva totalmente a cuberto, con carpas habilitadas e actividades no pavillón municipal, permitindo gozar da xornada con normalidade ao longo de todo o día.
A Festa da Filloa da Pedra é unha celebración que combina gastronomía, tradición, música, artesanía e inclusión social. O ano pasado elaboráronse entre 7.000 e 8.000 filloas, e nesta edición volverán estar en funcionamento 35 pedras, facendo das filloas o eixo central dunha xornada pensada para todos os públicos.
Programación con deporte, música e tradición
A xornada arrancará ás 09.30 horas coa degustación de filloas e desenvolverase ao longo de todo o día cun programa variado que combina deporte, tradición, música e cultura popular.
Ás 10.00 horas celebrarase a II Ruta Ciclista da Filloa, seguida, ás 11.00 horas, dun obradoiro de treboada. A música tradicional terá un protagonismo especial a partir das 12.00 horas coas actuacións da Escola de Música Tradicional da Baña e de As Atrevidas de Monte, mentres que ás 12.15 horas terá lugar un obradoiro de cestería tradicional.
O pregón, a cargo do escritor Manuel Iglesias Turnes, pronunciarase ás 13.30 horas, dando paso ás 14.00 horas ás actuacións do Trío Alborada, Bouba e A Requinta de Lampai.
A xornada culminará ás 19.00 horas cun concerto de fin de festa a cargo de De Ninghures, un dos grupos galegos con maior proxección actual, que poñerá o broche de ouro a unha edición marcada pola tradición, a música e a participación popular.
Dende a Concellería de Acción Social, Cultura e Servizos á Cidadanía tamén se destaca a vertente social da festa. Este ano, o merchandising oficial foi deseñado pola Fundación Discapacitados Psíquicos Barcala.
O posto de venda estará operativo durante toda a xornada, permitindo aos asistentes colaborar cun proxecto de inclusión social mentres levan un recordo da festa. Tamén está habilitado o correo fundacionnegreira@gmail.com para pedidos.
