Obradoiros, teatro ou deporte enchen o programa de actividades que durará ata o día 27 de marzo.
O Concello de Melide comeza a conmemoración do 8M, Día Internacional da Muller, coa lectura do manifesto hoxe venres, as doce do mediodía, diante do concello.
O texto reivindica unha serie de valores como a loita pola igualdade en todos os ámbitos, caso do laboral ou o doméstico, e a repulsa pola violencia de xénero en todas as súas expresións. Tamén será un momento de recoñecemento das mulleres que no día a día loitan pola igualdade de dereitos e oportunidades.
O vindeiro domingo 9 celebrarase o I Encontro Mulleres Bocelo-Melide 10K, unha proba deportiva onde as participantes poden anotarse para andar ou para correr. A través dun espazo natural privilexiado e ao longo dunha ruta que atravesa a comarca.
As inscricións están abertas no departamento de Deportes municipal ou no teléfono 639 82 13 71. A actividade está organizada pola AD Cerne, e conta coa colaboración do Concello de Melide.
Unha parte substancial das actividades vai dirixida á formación. Ata o 13 de marzo, o Centro Social acollerá o obradoiro Raíces. Trátase dunha actividade para o desenvolvemento da autoestima e a construción de redes de apoio e empoderamento grupal para mulleres.
As prazas son limitadas, polo que a inscrición debe levarse a cabo canto antes no Centro Social ou no teléfono 981 50 57 06. O obradoiro desenvolverase en horario de tarde, con comezo ás 17.30h.
O IES de Melide acollerá o seu propio obradoiro de formación, neste caso dirixido á mocidade. A través da actividade “PorNo(n) Educar”, o alumnado recibirá un obradoiro de educación sexual que fuxa dos roles de xénero e o discurso machista que impregna a pornografía, e promova unha visión da sexualidade igualitaria. O obradoiro desenvolverase os días 25, 26 e 27 de marzo.
O resto de actividades do 8M botan man da cultura. Por unha banda, o mércores 12 de marzo terá lugar a función “A igualdade non ten truco” de Magia en la Manga para o alumnado de 4º, 5º e 6º cursos de educación primaria de Melide.
Da man de Sara Rodríguez e Carlos Tomico, este espectáculo máxico a prol da igualdade de xénero utiliza o ilusionismo e as vivencias das mulleres magas para transmitir unha mensaxe esencial.
O martes 18, a escola infantil municipal acollerá a función de teatro infantil “Zapatos”. Este amplo programa municipal, diverso e orientado aos distintos segmentos de idade, pretende poñer de manifesto e complementar o labor que dende o Concello se leva a cabo de forma transversal a prol dunha sociedade de dereitos e oportunidades para todas as persoas.
