O Concello do Pino conmemora o Día Internacional contra a Violencia de Xénero, que se celebra o próximo domingo 25 de novembro, cunha campaña de sensibilización protagonizada polos veciños e veciñas que participan nas actividades deportivas municipais.
Entre as actividades máis importantes para esta xornada está campaña de sensibilización promovida polo Concello. Para levala a cabo, as persoas que participan nas diversas escolas e actividades deportivas municipais fixeron fotos con carteis alusivos ao rexeitamento desta lacra violenta. Centos de veciñas e veciños de todas as idades, dende os que participan na ximnasia por parroquias, ou os de running, tenis, futbito, ioga ou pilates, por citar algúns, ata os que acudiron á segunda etapa do Camiña e Descubre, sumáronse a esta iniciativa.
As actividades comezan, con todo, mañá mesmo. O CPI Camiño de Santiago acollerá unha charla que, baixo o título ‘Violencia de xénero no novo contexto dixital’, tentará sensibilizar á poboación adolescente da importancia de previr certas situacións á hora de utilizar as redes sociais e as ferramentas tecnolóxicas. Despois, ás 19.00 horas, a Casa da Cultura porá o escenario para outra conferencia, esta aberta a público familiar e educadores, sobre ‘O uso seguro e saudable das novas tecnoloxías’. Estas actividades impartiraas o colectivo Pantallas amigas, utilizando contidos audiovisuais e cunha metodoloxía dinámica, participativa e favorecedora do debate.
O mesmo recinto da Casa da Cultura será o lugar no que o venres, ás 11.30 h, se poña en escena a obra de teatro ‘Elisa e Marcela’, para alumnado de 2º, 3º e 4º da ESO. O texto baséase na historia real do primeiro matrimonio homosexual feminino que interpreta a compañía A Panadaría. Ás 13.00 h, no CPI Camiño de Santiago, representarase o espectáculo ‘Maxia pola igualdade’, a cargo da ilusionista Fanny Triana, para os cursos 5º e 6º de Primaria e 1º da ESO.
Con estas accións, o Concello do Pino quere situarse activamente fronte á violencia de xénero, ante a cal só cabe a resposta que dan os veciños e veciñas do municipio: NON.
